كتبت الفنانة امنة فاخر على صفحتها الرسمية تدوينة تعليقا على حفل الفنانة المصرية شيرين . و انتقدت فاخر شق كبير من الجمهور بقولها ما اخيب قلوبكم و فيما يلي التدوينة كاملة :
“البارح بالصدفة نلقى التلفزة الوطنية معدية حفلة شيرين من قرطاج عل المباشر… مانيش مغرومة بيها الحق اما تفرجت شوية… ضحكتها تهبل و حضورها مزيان… ساعة ساعة صوتها يهرب شوية اما المسرح باش يطرشق بالعباد إلي يغنيو معاها و شايخين.
عملت حاجة وجعتلي قلبي:كرمت ال psy متاعها و طبست باستلو يدو و قالت كان موش حضورو معايا ما كنتش نجم نرجع نغني…قد ما وجعتني الفازة قد ما عجبتني.
خلي ثماش ما التوانسة تفيق شوية بأهمية العلاج النفسي و تتلهى بالجانب هذا.هيا يا سيدي نحل الفايسبوك نلقى العباد تعارك :في نشاز، في مروحة ب ١٥٠ الف دولار، في كيف موش حاضرة للغناء لواش تجي ، في تمنيكت على الجمهور التونسي، في سمنت برشة ….اما اتعس حاجة قريتها قالك لازم تفصل الجانب المهني على الجانب الخاص !!!!يعني فنان يغني على المشاعر و الحب ما عندوش الحق يحكي على مشاعرو لجمهورو؟؟؟!
يعني مرأة تحطمت بعد طلاق صعيب و فضايح و مشاكل خايبة ما عندهاش الحق تاقف على ساقيها و ترجع تغني قدام جمهور شايخ معاها و حاسس بيها…. باهي نفرضوا ما زالت مجروحة و موجوعة و سمنت من الدواء و ال dépressionلازمها تتخبى؟؟؟ تزيد تتحطم؟؟؟! تقعد تستنى حتى ترجع في الصورة المثالية …La perfection n’existe pas et la personne est faite de ces expériences et cicatrices
.تي بالله العظيم فديت عل الآخر ملي قريتو. قداش القلوب قسات و قداش العباد تنسى إليça n’arrive pas qu’aux autres !تي سهرية رغم شوية النشاز ، درس من دروس الحياة.المرأة تشكر في الجمهور و تقولوا بما معناه ترجعوا الحياة للموتى… المرأة كان ميتة نفسانيا و عاودت حيات… حاولوا تعملوا كيفها بربي.مخيب قلوبكم”.
